കാലടിയിലെ നിലവിലുള്ള പാലത്തിന്റെ അറ്റകുറ്റപ്പണികള് ഇന്ന് രാത്രി ആരംഭിക്കും. 14 വരെ രാത്രികളിലാണ് പണികള്. ഈ ദിവസങ്ങളില് 11-ാം തീയതി ഒഴികെ രാത്രി 10 മുതല് രാവിലെ ആറുവരെ പാലത്തിലൂടെയുള്ള ഗതാഗതം പൂര്ണമായി നിരോധിക്കും. കര്ക്കടക വാവ് പ്രമാണിച്ച് 11ന് രാത്രി പാലത്തില് ഗതാഗത നിയന്ത്രണം ഉണ്ടാകില്ലെന്ന് മനോജ് മൂത്തേടന് എംഎല്എ അറിയിച്ചു.
മറ്റു ദിവസങ്ങളില് രാത്രി നിരോധന സമയത്ത് അങ്കമാലി ഭാഗത്ത് നിന്ന് എംസി റോഡ് വഴി പോകേണ്ട വലിയ വാഹനങ്ങള് ആലുവ- പെരുമ്പാവൂര് വഴിയും പെരുമ്പാവൂരില് നിന്ന് തിരികെ ഇതേവഴിയും പോകണം. അങ്കമാലി ഭാഗത്ത് നിന്നുള്ള ചെറുവാഹനങ്ങള്ക്ക് കാലടിക്കടുത്ത് മറ്റൂരില് നിന്ന് ഇടത്തോട്ടു തിരിഞ്ഞ് മലയാറ്റൂര്- കോടനാട് പാലം, വല്ലം വഴിയും ഇതുവഴി തന്നെ തിരികെയും പോകാവുന്നതാണ്.
മൂവാറ്റുപുഴ, പെരുമ്പാവൂര് ഭാഗത്ത് നിന്ന് കൊച്ചി വിമാനത്താവളത്തിലേക്കുള്ള വാഹനങ്ങള് പെരുമ്പാവൂരിനും കാലടിക്കും ഇടയില് വല്ലം ജംഗ്ഷനില് നിന്ന് ഇടത്തോട്ട് തിരിഞ്ഞ് വല്ലംകടവ്- പാറപ്പുറം പാലം, കാഞ്ഞൂര് വഴി പോകണം. തിരിച്ചും ഈ വഴി ഉപയോഗിക്കാവുന്നതാണ്.
