സംസ്ഥാനത്ത് പകര്ച്ച വ്യാധികള് പ്രതിരോധത്തിനായി ആരോഗ്യ വകുപ്പ് നിര്ദേശിച്ച ഡ്രൈ ഡേ ഇന്ന് സ്കൂളുകളില് ആചരിക്കും. ശനിയാഴ്ച സര്ക്കാര് സ്ഥാപനങ്ങളിലും ഞായറാഴ്ച വീടുകളിലും ശുചീകരണ പരിപാടികള് ആസൂത്രണം ചെയ്തിട്ടുണ്ട്. ഷിഗെല്ല, ഡെങ്കിപ്പനി, എലിപ്പനി തുടങ്ങിയ പകര്ച്ച വ്യാധികള് തടയുക എന്ന ലക്ഷ്യത്തോടെയാണ് പ്രതിരോധ പ്രവര്ത്തനങ്ങള് ആസൂത്രണം ചെയ്തിരിക്കുന്നത്. ജില്ലാ മെഡിക്കല് ഓഫീസര്മാരുമായും കലക്ടര്മാരുമായും ആരോഗ്യമന്ത്രി കെ മുരളീധരന് ബുധനാഴ്ച നടത്തിയ യോഗത്തിലാണ് മൂന്ന് ദിവസം ഡ്രൈ ഡേ ആചരിക്കാന് തീരുമാനമായത്.
മഴക്കാല പൂര്വ്വ ശുചീകരണ പ്രവര്ത്തനങ്ങളിലെ പോരായ്മകള് കണക്കിലെടുത്താണ് അടിയന്തരമായി ഡ്രൈ ഡേ നടപടികളുമായി മുന്നോട്ടുപോകാന് സര്ക്കാര് തീരുമാനിച്ചത്. ഇത്തവണ മഴക്കാല പൂര്വ ശുചീകരണ പ്രവര്ത്തനങ്ങള് തെരഞ്ഞെടുപ്പില് മുങ്ങിപ്പോകുന്നതാണ് കണ്ടത്. ഇക്കാര്യം കഴിഞ്ഞ ദിവസം ആരോഗ്യമന്ത്രി കെ മുരളീധരന് സമ്മതിക്കുകയും ചെയ്തിരുന്നു. ഈ പശ്ചാത്തലത്തിലാണ് പകര്ച്ചവ്യാധി വ്യാപനം തടയാന് അടിയന്തര നടപടികള് സ്വീകരിക്കാന് തീരുമാനിച്ചത്.
ഷിഗെല്ല രോഗവ്യാപനത്തിനിടെ തിരുവനന്തപുരത്ത് എം പോക്സും റിപ്പോര്ട്ട് ചെയ്തിരുന്നു. കിളിമാനൂര് പുളിമാത്ത് സ്വദേശിയായ 43 കാരനാണ് വ്യാഴാഴ്ച രോഗം സ്ഥിരീകരിച്ചത്. രോഗിയുടെ മറ്റ് വിവരങ്ങള് പുറത്തുവിട്ടിട്ടില്ല. ഈ വര്ഷം ഇതുവരെ എട്ട് പേര്ക്കാണ് എം പോക്സ് സ്ഥിരീകരിച്ചത്. ഈ മാസം ആദ്യമായാണ് രോഗം സ്ഥിരീകരിക്കുന്നത്. വ്യാഴാഴ്ച സംസ്ഥാനത്ത് 19 പേര്ക്ക് കൂടി ഷിഗെല്ല സ്ഥിരീകരിച്ചിട്ടുണ്ട്. തിരുവനന്തപുരം 2, കൊല്ലം 1, എറണാകുളം 1 തൃശൂര് 3 മലപ്പുറം 1, കോഴിക്കോട് 9, കണ്ണൂര് 2 എന്നിങ്ങനെയാണ് ഷിഗെല്ല രോഗ ബാധ റിപ്പോര്ട്ട് ചെയ്തത്.
