ബോളിവുഡ് നടൻ ടൈഗർ ഷ്‌റോഫിന്റെ കാറിന് നേരെ മുംബൈയിലെ ജൂഹുവിൽ വെടിയുതിർത്ത സംഭവത്തിൽ ഒളിവിൽ പോയ മൂന്ന് പ്രതികളെയും കസ്റ്റഡിയിലെടുത്തു. രാജസ്ഥാൻ പോലീസും ആന്റി ഗാങ്‌സ്റ്റർ ടാസ്‌ക് ഫോഴ്‌സും (എ.ടി.എഫ്) ചേർന്നാണ് പ്രതികളെ കസ്റ്റഡിയിലെടുത്തത്. 17, 18, 22 വയസ് പ്രായമുള്ളവരാണ് പ്രതികൾ. രണ്ടുപേർ ഹരിയാന സ്വദേശികളും ഒരാൾ ബിഹാർ സ്വദേശിയുമാണ്.മുംബൈയിൽനിന്ന് ഡൽഹിയിലേക്ക് ട്രെയിനിൽ സഞ്ചരിക്കവെ രാജസ്ഥാനിലെ കോട്ട റെയിൽവേ സ്റ്റേഷനിൽവെച്ചാണ് പ്രതികൾ പിടിയിലായത്. വെടിവെപ്പ് സംഭവത്തിന് ശേഷം രക്ഷപ്പെടാൻ ശ്രമിച്ച സംഘം വസായിൽനിന്നാണ് ട്രെയിനിൽ കയറിയതെന്നും ട്രെയിൻ കോട്ട റെയിൽവേ സ്റ്റേഷനിൽ എത്തിയപ്പോൾ ഇവരെ കോട്ട പോലീസ് പിടികൂടുകയായിരുന്നുവെന്നും എ.ടി.എഫ് രാജസ്ഥാൻ സ്ഥിരീകരിച്ചു.
പൂനെ ജങ്ഷനിൽനിന്ന് ജയ്പ്പൂർ ജങ്ഷനിലേക്ക് സർവീസ് നടത്തുന്ന 12939-ാം നമ്പർ പൂനെ-ജയ്പ്പൂർ സൂപ്പർഫാസ്റ്റ് എക്സ്പ്രസ് ട്രെയിനിലാണ് പ്രതികൾ സഞ്ചരിച്ചിരുന്നത്. കല്യാൺ ജങ്ഷൻ, വസായ് റോഡ് എന്നിവിടങ്ങളിൽ സ്റ്റോപ്പുകളുള്ള ഈ ട്രെയിൻ ഗുജറാത്ത്, മധ്യപ്രദേശ് എന്നീ സംസ്ഥാനങ്ങൾ കടന്നാണ് രാജസ്ഥാനിലേക്ക് പ്രവേശിക്കുന്നത്. പ്രധാന സ്റ്റോപ്പുകളിലൊന്നാണ് കോട്ട.
ഞായറാഴ്ച വൈകിട്ടാണ് ബോളിവുഡ് താരം ടൈഗർ ഷ്‌റോഫിന് നേരെ വധശ്രമമുണ്ടായത്. ബൈക്കിലെത്തിയ മൂന്നുപേർ ജുഹുവിൽവെച്ച് നടന്റെ കാറിനുനേരെ വെടിയുതിർക്കുകയായിരുന്നു. മൂന്ന് റൗണ്ട് വെടിവെപ്പ് ഉണ്ടായതായി പോലീസ് അറിയിച്ചു. നടൻ പരിക്കേൽക്കാതെ രക്ഷപ്പെട്ടു. എന്നാൽ, ഡ്രൈവർക്കും അവിടെ ഉണ്ടായിരുന്ന ഓട്ടോ ഡ്രൈവർക്കും പരിക്കേറ്റു.പിന്നാലെ വെടിവെച്ചത് തങ്ങളാണെന്ന് അവകാശപ്പെട്ട് അധോലോക കുറ്റവാളി ലോറൻസ് ബിഷ്‌ണോയ്‌യുടെ സംഘം രംഗത്തുവന്നിരുന്നു. വിദേശത്തു താമസിക്കുന്ന ഗുണ്ടാസംഘാംഗങ്ങളായ അനിൽ പണ്ഡിറ്റ്, ഹർമൻ സന്ധു എന്നിവരുടെതെന്ന് സംശയിക്കുന്ന സാമൂഹികമാധ്യമ പോസ്റ്റിലാണ് ഉത്തരവാദിത്വം ഏറ്റെടുത്തത്.
