യാത്രക്കാർ ഏറെ കാത്തിരുന്ന ഇന്ത്യയിലെ ആദ്യത്തെ വന്ദേഭാരത് സ്ലീപ്പർ ട്രെയിൻ സർവീസ് പ്രധാനമന്ത്രി നരേന്ദ്ര മോദി ഇന്ന് രാജ്യത്തിന് സമർപ്പിക്കും. പശ്ചിമ ബംഗാളിലെ ഹൗറയെയും അസമിലെ ഗുവാഹത്തിയെയും ബന്ധിപ്പിച്ചാണ് ഈ ട്രെയിൻ സർവീസ് നടത്തുന്നത്. പശ്ചിമ ബംഗാളിലെ മാൽഡ ടൗൺ സ്റ്റേഷനിൽ വെച്ചാണ് പ്രധാനമന്ത്രി ഫ്ലാഗ് ഓഫ് കർമ്മം നിർവഹിക്കുന്നത്.
മണിക്കൂറിൽ 180 കിലോമീറ്റർ വരെ വേഗതയിൽ സഞ്ചരിക്കാൻ ശേഷിയുള്ള ഈ ട്രെയിനിൽ ആർ.എ.സി (RAC) സീറ്റുകൾ ഉണ്ടാകില്ലെന്നത് യാത്രക്കാർക്ക് കൂടുതൽ സൗകര്യപ്രദമായ ഉറക്കവും യാത്രാസുഖവും ഉറപ്പാക്കുന്നു. ട്രെയിൻ സർവീസിനൊപ്പം 3000 കോടിയിലധികം രൂപയുടെ റെയിൽ-റോഡ് അടിസ്ഥാന സൗകര്യ വികസന പദ്ധതികളുടെ സമർപ്പണവും പ്രധാനമന്ത്രി നിർവഹിക്കും.
കൂടാതെ, പശ്ചിമ ബംഗാളിനായി പന്ത്രണ്ടിലധികം പുതിയ ട്രെയിൻ സർവീസുകൾ കൂടി കേന്ദ്ര റെയിൽവേ മന്ത്രിയുടെ സാന്നിധ്യത്തിൽ അദ്ദേഹം പ്രഖ്യാപിക്കും. നിയമസഭാ തിരഞ്ഞെടുപ്പ് അടുത്തിരിക്കുന്ന സാഹചര്യത്തിൽ, അസം, പശ്ചിമ ബംഗാൾ സംസ്ഥാനങ്ങൾക്കായി വൻതോതിലുള്ള വികസന പദ്ധതികളാണ് കേന്ദ്ര സർക്കാർ ഈ സന്ദർശനത്തിലൂടെ വിഭാവനം ചെയ്തിരിക്കുന്നത്.
